Revo pri Esperantejo

Jairo dos Santos revas pri komerce funkcianta loko por la publiko de Esperanto kaj serĉas homojn, kiuj ŝatas kunfari en la projekto. Vidu ankaŭ nubo.re/app/post/view/1822

“Nu do, mi decidis fari ian esperantan lokon kiel kafejon, lunĉejon aŭ restoracion per Esperanto. Sed ne nur promociante la nomon Esperanto sen ia rilato. Esperanto bezonas monon! Esperanto bezonas eniri en financan areon. La celo de tiu spaco estas fari ian etoson kiel tiujn tipajn temajn lokojn. En mia lando, ekzemple, ni havas diversajn naciajn komercajn lokojn…”

Legu lian artikolon pri la projekto: steempeak.com/@jxajro/kafodrinkejo

Kampanjo por apogi la 1-an Filipinan Junularan Kongreson de Esperanto

Karaj esperantistoj de la tuta mondo,

Filipina Esperanto-Junularo (FEJ) kun honoro anoncas, ke ĝi decidis organizi la historian 1-an Filipinan Junularan Kongreson de Esperanto, kiu okazos de la 23-a ĝis la 26-a de aprilo 2020 en la Universitato de Filipinoj Diliman, en la urbo Quezon (Manila).

La kongreso markos la kulminon de la plurjara klopodo de aktivuloj por disvastigi la lingvon kaj solidigi la movadon en Filipinoj. La nuntempa filipina movado daŭre progresas ekde kiam ĝi aperis en 2013; kaj tio ĉi estos la unua oportuno kunvenigi lokajn esperantistojn tra la insularo. Ĝi celas ebligi al ĉiuj elpensi strategiojn por plifortigi la movadon. Aldone, per buntaj programeroj, la partoprenontoj de diversaj fakoj kaj interesoj povos libere kune lerni, interagi, kaj labori. Ni estas fervoraj realigi ĝuste aranĝon tian. Tamen, kiel neprofitcela junulara organizo, ni ne havas sufiĉajn ekonomiajn rimedojn por plene realigi iniciaton tiom ĉi grandan.

Tial, ni ŝatus fari raran paŝon peti al la internacia komunumo unuiĝi por apogi nian iniciaton pere de la amasfinanca kampanjo kiun ni jene lanĉas.

La kampanjon vi povas vidi per tiu ĉi paĝo: gogetfunding.com/1fjksubteni/. Kompreneble, oni rajtas donaci kiom ajn da sumo laŭ propra plaĉo. Donacoj certigos ne nur financi ĝiajn gravajn erojn, sed ankaŭ helpos nin teni la aliĝkotizojn ne tro altaj kaj financi postajn agadojn de la loka movado, kaze de profito.

Vi ankaŭ povas iri al PayPal: bit.ly/fjkdonaci, aŭ ĝiri monon al nia UEA-konto (phej-d) de via konto aŭ per kreditkarto jene: uea.org/alighoj/spagilo. Pri aliaj manieroj, bonvolu skribi al ni: peyc2020@gmail.com. Se vi ankaŭ ŝatus apogi per materialoj, kiujn laŭ via opinio ni povus disponi, bonvolu kontakti nin.

Se vi subtenas la junularon aŭ/kaj movadojn en triamondaj landoj kaj ŝatus kontribui por kreskigi la aktivularon por la estonteco de la internacia movado, bonvolu apogi nian iniciaton. Krome, bonvolu diskonigi la kampanjon al viaj samklubanoj, amikoj, kaj aliaj konatoj. Se ni sukcesos, tio donos grandan motivon al filipinaj esperantistoj daŭre labori por la loka, kaj eventuale, por la internacia, movadoj, kaj tiel certigante ke la agado de la filipina movado estu daŭripova pluen.

Cetere, esperantistoj de ĉiuj aĝoj el aliaj landoj estos bonvenaj partopreni kaj kontribui por fari la kongreson aŭtentike verda kaj internacia. Estos ankaŭ via ŝanco vojaĝi kaj malkovri nian landon kaj ĝiajn kulturon kaj heredaĵojn. Detaloj pri aliĝoj kaj mendoj estos haveblaj ekde la venonta monato.

Ni kune realigu tiun ĉi revon! Koran antaŭdankon pro via eventuala apogo.

La Kongresa Organiza Komitato
1-a Filipina Junulara Kongreso de Esperanto


Albert Stalin T. Garrido
Commisioner for Asia, World Esperanto Youth Organization (TEJO)
Representative, Philippine Esperanto Youth (FEJ)
CEFR C1-Level Double Certificate Holder (Esperanto)
N4-Level JLPT Certificate Holder (Japanese)
Duolingo Certified Educator
albertstgarrido@gmail.com

Kunfarado en nubo.re

Certe vi konas la anonceton pri nubo.re en ĉi tiu retejo. Tie troveblas kunfarema grupeto de uzantoj, kiuj diskutas pri “aliaj retejoj similaj al Nubo“. Certe indas kundiskuti tie kaj eventuale kunfari je kreivaj taskoj, kiujn oni evoluas en nubo.re. Estus bone se la ideo de kunfarado enirus la kapojn de pli kaj pli da esperantoj.

nubo.re/app/forum/topic/1277/aliaj-retejoj-similaj-al-nubo

Unua Mez-Azia Kunveno

Organiza teamo de MAK-2020 plezure informas, ke la unua Mez-Azia Kunveno, kiu celas reaktivigon de regiona E-movado, okazos ekde la 1a ĝis la 5a de majo 2020 en Taĝikio, ĝia ĉefurbo Duŝanbeo, kun posta 3-taga ekskurso al Samarkando, antikva uzbekia urbo. Oni antaŭvidas multajn interesajn, atentokaptajn programerojn: klerigajn kaj artajn.

Partopreni la MAK-on estas invitataj geesperantistoj el la landoj de Mezazio, aliaj aziaj regionoj kaj diversaj partoj de la mondo. La aliĝado estas jam malfermita. Bv.legi pliajn informojn en la retejo de ĉi E-aranĝo: uea.org/vikio/Unua_Mez-Azia_Kunveno, kiu daŭre estas plenigata kaj lingve polurata. Eblas kontakti la organizantojn rete: mezaziakunveno@gmail.com Bonvenon!

UNESKO uzos Esperanton en festivalo, sed ni kunlaboru!


La 19an de septembro 2020 (post unu jaro) Unesko okazigos festivalon por la paco en Tolosa (Hispanio). La laborlingvoj de tiu ĉi festivalo estas la franca, la angla, la hispana kaj Esperanto. La festivalo konsistos grandparte el filmetoj de kiel eble plej multe da korusoj tra la mondo kantantaj por la paco en plej diversaj lingvoj, sed la tekstoj de la kantoj devos esti tradukitaj al unu el la kvar laborlingvoj: franca, angla, hispana aŭ Esperanto. UEA rigardas la festivalon kiel gravan ŝancon por kontribui en la realigo de la celoj de UN, kaj por vidigi al la publiko la valoron de la internacia lingvo Esperanto. Ju pli da korusoj estos rekomenditaj de esperantistoj, des pli videblos al la publiko utileco de Esperanto kaj vasteco de la naciecoj de la esperantistoj. UEA alvokas, ke landaj asocioj, lokaj grupoj kaj aktivuloj rekomendu korusojn, esperante ke ĉiu lando rekomendos almenaŭ unu koruson. Se vi konas koruson, kiu povus realigi tian 3-minutan filmeton de kanto por la paco, en iu ajn lingvo (kun traduko de la teksto al Esperanto) aŭ rekte en Esperanto, kontaktu François Lo Jacomo francois@lojacomo.eu, reprezentanto de UEA ĉe Unesko, kaj Trezoro Huang Yinbao trezoro@qq.com, vicprezidanto de UEA, respondeca pri la rilatoj kun Unesko.